අපරාධ පරීක්ෂණ දෙපාර්තමේන්තුව මගින් අත්අඩංගුවට ගත් හිටපු පොලිස්පති දේශබන්දු තෙන්නකෝන් එළැඹෙන 27 වනදා දක්වා රක්ෂිත බන්ධනාගාර ගතකරන ලෙස කොළඹ කොටුව මහෙස්ත්‍රාත් අධිකරණය අද (21) පස්වරුවේ නියම කරනු ලැබුවා.
කොළඹ කොටුව මහෙස්ත්‍රාත් නිලුපුලී ලංකාපුර මෙනවිය විසින් මෙම නියෝගය නිකුත් කළේ අපරාධ පරීක්ෂණ දෙපාර්තමේන්තුව සහ විත්තියේ නීතිඥවරු ඉදිරිපත් කළ කරුණු සලකා බැලීමෙන් අනතුරුවයි.
2022 වසරේ මැයි 09 වනදා ගාලු මුවදොර අරගල භූමියට පහරදීමේ සිදුවීම වළක්වා ගැනීමට නිසි නියෝග නිකුත් නොකිරීමට අදාළව දේශබන්දු තෙන්නකෝන් හෝකන්දර පිහිටි ඔහුගේ නිවසේදී ඊයේ (20) පස්වරුවේ අත්අඩංගුවට ගනු ලැබුවා.
මෙහිදී තමන් අත්අඩංගුවට ගැනීම වළක්වා අපේක්ෂිත ඇපයක් මත මුදාහරින ලෙස ඔහු කොටුව මහේස්ත්‍රාත් අධිකරණය හමුවේ අපේක්ෂිත ඇප අයැදුමක් ද ගොනුකර තිබූ බව සඳහන්.
කෙසේ වෙතත් අදාළ අපේක්ෂිත ඇප අයැදුම ඊයේ පෙරවරුවේ කොටුව මහේස්ත්‍රාත් නිලුපුලී ලංකාපුර මෙනවිය විසින් ප්‍රතික්ෂේප කරනු ලැබුවා.
මෙවැනි පුවත් එසැණින් දැනගන්න, අපගේ වට්ස් ඇප් සමූහය සමග එක්වන්න. සබැඳිය පහතින්.
https://chat.whatsapp.com/KKhm4cF9PLnBef39msv28s
