පාර්ලිමේන්තු මන්ත්‍රී නාමල් රාජපක්ෂ පෞද්ගලික ඝාතනයක් සැලසුම් කිරීමට සම්බන්ධ බවට සමාජ මාධ්‍ය ඔස්සේ අසත්‍ය වාර්තාවක් සංසරණය වීම සම්බන්ධයෙන් අපරාධ පරීක්ෂණ දෙපාර්තමේන්තුවට (CID) පැමිණිල්ලක් ඉදිරිපත් කර ඇති බව වාර්තා වනවා.
අද උදෑසන CID වෙත මේ සම්බන්ධයෙන් පැමිණිල්ලක් ගොනුකර තිබුනේ ශ්‍රී ලංකා පොදුජන පෙරමුණේ සාමාජිකයන් පිරිසක්.
නාමල් රාජපක්ෂ පිළිබඳ අසත්‍ය තොරතුරු යූ ටියුබ් තුළ සංසරණය වන බව ජනමාධ්‍ය වෙත අදහස් දක්වමින් ශ්‍රී ලංකා පොදුජන පෙරමුණේ සාමාජිකයකු පැවසුවා.
“ශ්‍රී ලංකා පොදුජන පෙරමුණට බලය ලබාගැනීම සඳහා පාතාල සම්බන්ධතා භාවිත කරමින්, පාර්ලිමේන්තු මන්ත්‍රී නාමල් රාජපක්ෂ විසින් දැනට රිමාන්ඩ් භාරයේ සිටින පුද්ගලයෙකු ඝාතනය කිරීමට සැලසුම් කරන බව යූ ටියුබ් නාලිකාවක් පවසනවා මෙම අසත්‍ය ප්‍රකාශ අපි තරයේ ප්‍රතික්ෂේප කරනවා” ඔහු වැඩිදුරටත් පවසා සිටියා.
මෙම යූ ටියුබ් නාලිකාව විදේශයන්හි සිට ක්‍රියාත්මක වන බවත්, එය ශ්‍රී ලංකා පොදුජන පෙරමුණට සහ එහි සාමාජිකයන්ට අපහාස කිරීමේ උත්සාහයක් බවයි ඔහු කියා සිටියේ.
මේ සම්බන්ධයෙන් පුළුල් පරීක්ෂණයක් ඉල්ලා CID වෙත පැමිණිල්ලක් ගොනුකර ඇති බවත් ඔහු තවදුරටත් කියා සිටියා.
මෙවැනි පුවත් එසැණින් දැනගන්න, අපගේ වට්ස් ඇප් සමූහය සමග එක්වන්න. සබැඳිය පහතින්.
https://chat.whatsapp.com/KKhm4cF9PLnBef39msv28s
