මැදපෙරදිග කලාපයේ මහා පරිමාණ යුද ගැටුමක අවදානම මතුකරමින් ඊශ්‍රායලය අද (13) අලුයම් කාලයේ ඉරානයට එල්ල කළ ප්‍රහාර මාලාවෙන් පසු මතුවී ඇති නොසන්සුන්කාරී තත්ත්වය පිළිබඳ ඊශ්‍රායලයේ ශ්‍රී ලංකා තානාපති කාර්යාලය නිවේදනයක් නිකුත් කර තිබේ.
නොසන්සුන් තත්ත්වයත් සමග ගුවන් ගමන් සීමා කර ඇති බැවින් ඊශ්‍රායලයට පැමිණෙන සහ ඊශ්‍රායලයෙන් පිටත්ව යන ලාංකිකයින් නැවත දැනුම් දෙන තුරු ගුවන් ගමන් පමා කරන ලෙස එම නිවේදනයේ දැක්වේ.
ඊශ්‍රායලයේ සිටින ශ්‍රී ලාංකිකයන්ට තම ආරක්ෂාව සලසා ගන්නා ලෙසත්, සතුරු පාර්ශ්වයන්ගෙන් එල්ල විය හැකි මිසයිලවලින් ආරක්ෂා වීම සඳහා ආරක්‍ෂිත කුටි ආසන්නයේ රැඳීසිටින ලෙසත්,සෑම අවස්ථාවකදීම බීමට අවශ්‍ය ජලය හා වියළි අහාර ළඟ තබා ගන්නා ලෙසත් ලාංකිකයින්ට උපදෙස් දෙන ශ්‍රී ලංකා තානාපති කාර්යාලය පවසා සිටී.
එමෙන්ම තානාපති කාර්යාලයේ නිලධාරීන් පැය 24 පුරා දුරකථනයෙන් සම්බන්ධ කර ගත හැකි බවද තානාපති කාර්යාලය පවසයි.
ඊශ්‍රායලයේ සහ ඉරානයේ ශ්‍රී ලංකා තානාපති කාර්යාල සමග සම්බන්ධවෙමින් නවතම තත්ත්වය පිළිබඳ තොරතුරු රැස් කරමින් සිටින බව මේ සම්බන්ධයෙන් අදහස් දක්වමින් ශ්‍රී ලංකා විදේශ කටයුතු අමාත්‍යාංශයද පෙන්වා දෙයි.
ඉරානයට එල්ල කළ දැවැන්ත ගුවන් ප්‍රහාර මාලාව හමුවෙ ඉරාන විප්ලවකාරී හමුදාවේ ප්‍රධානී හුසේන් සලාමි ද මියගොස් ඇති බව විදෙස් ආරංචි මාර්ග වැඩිදුරටත් පවසා සිටී.
විදෙස් මාධ්‍ය වාර්තා කළේ, “ඔපරේෂන් රයිසින් ලයන්” ලෙස නම්කර ඇති මෙම මෙහෙයුමේදී ඉරානයේ න්‍යෂ්ටික පහසුකම්, මිසයිල කම්හල් සහ හමුදා මූලස්ථාන ඉලක්ක වූ බවය. මෙම දැවැන්ත ප්‍රහාරයට ඉරානය නිසැකවම ප්‍රතිචාර දක්වනු ඇති බැවින් සිය රට තුළ හදිසි තත්ත්වයක් ප්‍රකාශයට පත්කර සියලු පාසල් වසා දැමීමට ඊශ්‍රායලය පියවර ගෙන තිබේ.
ඉරානයේ න්‍යෂ්ටික වැඩසටහනට සම්බන්ධ මධ්‍යස්ථාන මෙන්ම හමුදා ඉලක්ක වෙතද එල්ලවූ මෙම ප්‍රහාර සිදුකර තිබුණේ ඊශ්‍රායලයට අයත් IAF ජෙට් යානා යොදගනිමිනි. ඉරානයේ ප්‍රධානතම හමුදා ඒකකය ලෙස සැලකෙන ඉරාන ඉස්ලාමීය විප්ලවවාදී හමුදාවේ මූලස්ථානය ද ඊශ්‍රායල ප්‍රහාරවල ඉලක්කය වී තිබුණි.ඉරානය මාධ්‍ය වාර්තා කළේ ඊශ්‍රායල ප්‍රහාරයෙන් ඉරාන හමුදාපති මේජර් ජෙනරාල් මොහොමඩ් බගේරි මියගොස් ඇති බවයි.
එමෙන්ම ඉරාන න්‍යෂ්ටික වැඩසටහනට සම්බන්ධ විද්‍යාඥයින් රැසක් මෙම ප්‍රහාරවල ඉලක්කයන් වී තිබුණි. කෙසේවෙතත් නට්සාන් න්‍යෂ්ටික වැඩබිම වෙත එල්ල වූ බවට තහවුරු කළ ඊශ්‍රායල ප්‍රහාරවලින් එහි විකිරණ මට්ටම ඉහළ ගොස් නැතැයි ජාත්‍යන්තර න්‍යෂ්ටික බලශක්ති ඒජන්සිය පැවසීය.දැනටමත් ඉරානය ඊශ්‍රායලය වෙත ප්‍රහාරක යානා 200ක් පමණ යොමුකර ඇති බව විදෙස් මාධ්‍ය වාර්තා කර සිටී.
මෙය ප්‍රහාරයේ ආරම්භය වන අතර අවශ්‍ය ඕනෑම කාලයක් දක්වා ඉරානය වෙත ප්‍රහාර එල්ල කිරීම සිය සැලසුම බව ප්‍රහාරය සම්බන්ධව අදහස් පළකළ ඊශ්‍රායල අගමැති බෙන්ජමින් නෙතන්යාහු අවධාරණය කළේය.ඉරානය න්‍යෂ්ටික අවියක් අත්පත් කරගැනීම වැළැක්වීම සහ එමගින් සිය ජනතාව ආරක්ෂා කරගැනීම මෙම ප්‍රහාරය සිදුකළ බව ඊශ්‍රායල අගමැතිවරයා වැඩිදුරටත් පැවසීය.
මේ අතර තමන් කිසිලෙසක මෙම ප්‍රහාරයට ආධාර හෝ අනුබල නොදුන් බව අමෙරිකාව පවසා සිටි.කෙසේ වෙතත් මැදපෙරදිග කලාපයේ රැඳී සිටින අත්‍යාවශ්‍ය නොවන සියලු අමෙරිකානුවන්ට එම කලාපයෙන් ඉවතවන ලෙස අමෙරිකාව පසුගියදා නියෝග කළේය.
මැදපෙරදිග කලාපය අස්ථාවර කරමින් ඉරාන න්‍යෂ්ටික මර්මස්ථාන වෙත ඊශ්‍රායලය එල්ල කළ ප්‍රහාරය එක්සත් ජාතීන්ගේ සංවිධානය හෙළා දැක තිබේ.
