පාස්කු ඉරිදා ත්‍රස්ත ප්‍රහාරය සඳහා ආධාර අනුබල දුන්නේ යැයි අත්අඩංගුවට ගෙන පසුව ඇප මත මුදා හැර සිටි සැකකරුවන් දස දෙනෙකු සහ සැකකාරියන් දෙදෙනෙකු මුදාහරින ලෙස කොළඹ මහේස්ත්‍රාත් අධිකරණය ඊයේ(16) නියෝග කළේය.
මෙම සැකකරුවන් සම්බන්ධයෙන් විමර්ශන සිදු කළ ත්‍රස්ත විමර්ශන කාර්යාංශය ඔවුන්ට අදාළ විමර්ශන අවසන් කර අදාල නීතිපතිවරයා වෙත ඉදිරිපත් කර තිබූ අතර, නීතිපතිවරයාගෙන් ලැබුණු උපදෙස් අනුව මෙම පැමිණිල්ල අවසන් කිරීමට කටයුතු කරන බව පොලිසිය අධිකරණයට දන්වා සිටියේය.
ඒ අනුව කොළඹ අතිරේක මහේස්ත්‍රාත් පසන් අමරසේන මහතා අදාළ සැකකරුවන් මුදා හරින ලෙස නියෝග කළේය.
සැකකරුවන් අත්අඩංගුවට ගැනීමේදී ඔවුන් භාරයේ තිබී පොලිසිය භාරයට ගන්නා ලද ජංගම දුරකථන ඇතුළු නඩු භාණ්ඩ ඔවුන් වෙත මුදා හැරීමේ නියෝගයක් නිකුත් කරන ලෙස සැකකරුවන් වෙනුවෙන් පෙනී සිටී නීතිඥවරයා අධිකරණයට කරන ලද ඉල්ලීමකට අනුව, සැකකරුවන් වෙත අදාල භාණ්ඩ මුදා හරින ලෙසත් මහේස්ත්‍රාත්වරයා නියෝග කළේය.
